વન નેશન વન એપ્લિકેશન મુજબ ગુજરાત વિધાનસભાને પેપરલેસ બનાવવાની દિશામાં ગુજરાતે મક્કમ પગલું ભર્યું છે. વિધાનસભા સત્રની સંપુર્ણ કામગીરી પેપરલેસ કરવાની તૈયારીઓ ચાલી રહી છે. આગામી તા. 13મી સપ્ટેમ્બરથી યોજાનાર વિધાનસભાનું ચોમાસુ સત્ર સંપૂર્ણપણે પેપરલેસ યોજવા ગુજરાત વિધાનસભા ખાતે રાજ્યના તમામ ધારાસભ્યો માટે તાલીમ વર્કશોપ ચાલી રહ્યો છે. મુખ્યપ્રધાન ભૂપેન્દ્ર પટેલે આ વર્કશોપમાં સહભાગી થઈને નેશનલ ઇ-વિધાન એપ્લિકેશન-NEVAની તાલીમ મેળવી હતી.
મુખ્યપ્રધાને નેશનલ ઇ-વિધાન એપ્લિકેશન થકી થનાર અલગ અલગ કામગીરીની બારીકાઇથી માહિતી મેળવી હતી. ઉપરાંત આ એપ્લિકેશન મારફતે વિધાનસભા કાર્યવાહી સંલગ્ન વોટીંગ, એલ.એ.ક્યુ સહિતની વિવિધ પ્રક્રિયા કેવી રીતે કરવી તેની જાણકારી પણ મેળવી હતી.
રાજ્યની વિધાનસભાને પેપરલેસ બનાવવાની સમગ્ર પ્રક્રિયા ઝડપથી થઇ શકે તે માટે સંસાધનોની ખરીદીથી માંડીને તમામ પ્રક્રિયામાં રાજ્ય સરકારનો ખુબ સારો સહયોગ મળ્યો છે તે બદલ રાજ્યના મુખ્યપ્રધાન ભૂપેન્દ્ર પટેલનો ગુજરાત વિધાનસભાના અધ્યક્ષ શંકરભાઈ ચૌધરીએ આભાર વ્યક્ત કરી વિવિધ સંલગ્ન વિભાગો તેમજ વિધાનસભાના અધિકારી તથા કર્મચારીઓને સમગ્ર વ્યવસ્થાઓ ત્વરિત ઉભી કરવા બદલ અભિનંદન પાઠવ્યા હતા.
અધ્યક્ષ શંકરભાઈ ચૌધરીએ જણાવ્યુ કે, નેશનલ ઇ-વિધાન એપ્લિકેશનના ઉપયોગ થકી વિધાનસભાનું આગામી ચોમાસુ સત્ર ચાલશે.
રાજ્યના તમામ ધારાસભ્યો ટેબલેટની મદદથી ટેકનોલોજી આધારિત સમગ્ર કામગીરીમાં જોડાશે અને તે માટે તમામ ધારાસભ્યોને તાલીમબદ્ધ કરવામાં આવી રહ્યા છે. ભવિષ્યમાં આ એપ્લિકેશનનો વ્યાપ વધારી તેની સાથે રાજ્યના નાગરિકોને જોડી પ્રજાલક્ષી કાર્યો તથા પ્રશ્નોનું ડિજીટલી ત્વરીત નિરાકરણ લાવવા માટેના પ્રયત્નો હાથ ધરાશે.
એટલુ જ નહિ, વિધાનસભા કામગીરી સાથે જોડાયેલી તમામ બાબતોને આ એપ્લિકેશનમાં આવરી લઈ ધારાસભ્યો પણ આંગળીના ટેરવે તમામ માહિતી મેળવી શકશે. ઉપરાંત, ગૃહમાં આવેલા પ્રસ્તાવ પર પોતાનો મત તથા તેમની હાજરી પણ એપ્લિકેશનના માધ્યમથી આપી શકશે.
આ પ્રસંગે વિધાનસભાના સભ્યો તથા સચિવો તેમજ વિધાનસભાના અધિકારીઓ તથા કર્મચારીઓ ઉપસ્થિત રહ્યા હતા.