અમદાવાદ- Stock Market India શેરબજારમાં આજે ગુરુવારે તેજીની આગેકૂચ રહી છે. સેન્સેક્સે(BSE Sensex) 86,055ની નવી હાઈ બનાવી છે. નિફ્ટીએ(NSE Nifty) 26,310 ઑલ ટાઈમ હાઈ લેવલ બતાવ્યું છે. બેંક નિફ્ટી(Bank Nifty) પણ વધીને 59,866ની હાઈ બનાવી છે. આમ શેરબજારમાં આજે ઓલ રાઉન્ડ લેવાલી ચાલુ રહી છે. શેરબજારમાં(Share Market India) નવી તેજી થવા પાછળ પાંચ નવા કારણો છે? આ તેજી કેટલી આગળ વધશે? ટેકનિકલ લેવલ શું કહે છે? જૂઓ વીડિયો….
તેજીવાળાની નવી લેવાલી ચાલુ રહી
આજે 27 નવેમ્બર, 2025ના રોજ માર્કેટ ખૂલતાની સાથે નિફ્ટી અને સેન્સેક્સે ઓલ ટાઈમ હાઈના લેવલ બતાવ્યા હતા. આજે ખાસ કરીને ફાયનાન્સિયલ સર્વિસીઝ(એનબીએફસી), પીએસયુ બેંક અને મેટલ સેકટરના સ્ટોકમાં નવી લેવાલી આવી હતી. જો કે આઈટી અને એનર્જિ સ્ટોકમાં સામાન્ય વેચવાલીથી નરમાઈ હતી.
14 મહિના પછી રેકોર્ડ હાઈ
નિફ્ટીએ 287 ટ્રેડિંગ સેશન બાદ નવો હાઈ બનાવ્યો છે એટલે કે 14 મહિના પછી રેકોર્ડ હાઈ બતાવ્યો છે. તેજીવાળા ખેલાડીઓની નવી લેવાલી ચાલુ રહી હતી. પરિણામે ગઈકાલ બુધવારના ઉછાળા પછી આજે ગુરુવારે પણ નવી લેવાલીથી તેજીની આગેકૂચ રહી હતી. જો કે મીડકેપ અને સ્મોલકેપમાં નવી લેવાલીના અભાવે નરમાઈ રહી હતી.
શેરબજારમાં તેજીના પાંચ નવા કારણ
(1) યુએસ ફેડરલ રીઝર્વની એફઓએમસીની બેઠકમાં ફેડ રેટમાં કટ થવાનો આશાવાદ ફરીથી વહેતો થયો હતો. ફેડ રેટ કટ આવશે તો ઈમર્જિંગ માર્કેટમાં વિદેશી રોકાણનો પ્રવાહ આવશે. તેમજ રીઝર્વ બેંક ઓફ ઈન્ડિયાની મોનેટરી પૉલીસીના રિવ્યૂ માટે બેઠક મળશે. જેમાં રેપો રેટમાં 25 બેસીસ પોઈન્ટનો ધટાડો થવાની ધારણા છે. આરબીઆઈના લક્ષ્યાંક કરતાં પણ ફુગાવાનો દર નીચો ચાલી રહ્યા છે, જેથી આરબીઆઈ વ્યાજ દરમાં ઘટાડો કરી શકે છે. જેને પગલે ભારતીય શેરબજારનું સેન્ટિમેન્ટ તેજીમય થયું હતું.
(2) ઓકટોબરમાં દિવાળીના તહેવારોમાં કન્ઝમ્પશન ડેટા મજબૂત રહ્યો છે, આથી આવી ધારણા છે કે હવે આગામી ડીસેમ્બર એન્ડિંગ અને માર્ચ એન્ડિંગના કવાર્ટર થ્રી અને ફોરના કંપનીઓના પરિણામો પ્રોત્સાહક આવશે. જેથી બજારમાં તેજીનો માહોલ રહ્યો હતો.
(3) રશિયા અને યુક્રેન વચ્ચે શાંતિ સમજૂતીની ચર્ચા અને બેઠકો દોર ચાલી રહ્યો છે. જેની સીધી પોઝિટિવ અસર ગ્લોબલ માર્કેટ પર થઈ છે. આજે સવારે એશિયાઈ સ્ટોક માર્કેટ પ્લસ હતા અને બપોરે યુરોપિયન સ્ટોક માર્કટ પણ પ્લસમાં ખૂલ્યા હતાય ડાઉ જોન્સ ફ્યુચર 60 પોઈન્ટ પ્લસ હતો.
(4) એફઆઈઆઈની લેવાલી- છેલ્લી બે ટ્રેડિંગ સેશનથી એફઆઈઆઈ નેટ બાયર રહી છે. 25 નવેમ્બરે એફઆઈઆઈએ 785 કરોડ રૂપિયાની ચોખ્ખી ખરીદી કરી હતી. 26 નવેમ્બરે 4778 કરોડ રૂપિયાની નેટ ખરીદી કરી હતી. આમ પાંચ મહિના નેટ સેલર રહ્યા પછી એફઆઈઆઈએ નવેસરથી ખરીદી શરૂ કરી છે, જેની શેરબજારના સેન્ટિમેન્ટ પર તેજીની અસર થઈ હતી.
(5) આઈએમએફના એક રીપોર્ટ અનુસાર ભારત 2029 સુધીમાં 5 ટ્રિલિયન ડૉલરની ઈકોનોમી બની જશે અને ભારતની લોંગ ટર્મ ગ્રોથ સ્ટોરી છે. આ રીપોર્ટ પછી શેરબજારમાં નવી લેવાલી ચાલુ રહી હતી.