સક્રિય સદસ્યતા અભિયાનએ ભાજપની ઓળખ, સંગઠનની રચના અને ચૂંટાયેલ પ્રતિનિધી માટે અતિ મહત્વનું છે: ભરતભાઇ પંડ્યા
ગુજરાતનાં મુખ્યપ્રધાન ભૂપેન્દ્રભાઈ પટેલને પ્રદેશ પ્રમુખ સી.આર.પાટીલે સક્રિય સભ્યનું ફોર્મ ભરાવીને આજે 23 ઓકટોબરને બુધવારે સક્રિય સભ્ય બનાવ્યાં હતાં. આ સમયે પ્રદેશ સંગઠન મહામંત્રી રત્નાકરજી, પ્રદેશ મહામંત્રી રજનીભાઈ પટેલ ઉપસ્થિત રહ્યાં હતાં.
ગુજરાત ભાજપ સક્રિય સદસ્યતા અભિયાનની માહિતી આપતાં ભરતભાઈ પંડયાએ પત્રકાર પરીષદમાં જણાવ્યું હતું કે, સમગ્ર ગુજરાતમાં પ્રાથમિક સભ્યની સાથે સાથે સક્રિય સદસ્યતાનો પ્રારંભ ભાજપ પ્રદેશ પ્રમુખ અને કેન્દ્રીય પ્રધાન સી.આર.પાટીલે તા.19મી ઓક્ટો, 2024ના રોજ પ્રથમ સક્રિય સભ્ય બનીને સંગઠનમાં “સક્રિય સદસ્યતા અભિયાન”ની શરૂઆત કરાવી હતી.
ભરત પંડયાએ જણાવ્યું હતું કે, લોકશાહીમાં સંખ્યાબળ અગત્યનું પરિબળ છે. વિશ્વમાં સૌથી મોટી રાજકીય પાર્ટી ભાજપ છે. પ્રાથમિક સભ્ય બનાવવા માટેનું અભિયાન એ મતદારો, શુભેચ્છક અને કાર્યકર્તા સુધીના બહુ મોટા વ્યાપ આધારીત છે. વિશ્વમાં સૌથી મોટી રાજકીય પાર્ટી બનવા માટેનું સંખ્યાત્મક અને પ્રચારાત્મક રીતે મહત્વનું છે. જ્યારે સક્રિય સદસ્યતા અભિયાન એ ભાજપની ઓળખ, સંગઠનની રચના અને ચૂંટાયેલ પ્રતિનિધી માટે અતિ મહત્વનું છે. એટલે કે, સક્રિય સદસ્યતા અભિયાન પ્રવેશોત્સવ પછી ગુણોત્સવ માટેનો અવસર છે.
તા.31 ઓક્ટોબર, 2024 સુધી ચાલનાર સક્રિય સદસ્યતા અભિયાનમાં કાર્યકર્તાઓએ સક્રિય સભ્ય બનવા માટે સક્રિય સભ્યનું ફોર્મ ભરવું, ઓનલાઈન 100 પ્રાથમિક સભ્યોના નામોની યાદી લખવી, નમો એપ કે ભાજપના વેબવોર્ટલ ઉપર એક્ટીવ મેમ્બર તરીકે 100 રૂ.નું ડોનેશન તેમજ રૂ.200 ગુજરાત ભાજપના ‘મનોગત’ લવાજમના આપવાનાં રહેશે.
ભરત પંડયાએ વધુમાં જણાવ્યું હતું કે, સક્રિય સદસ્યતા અભિયાનની ઝૂંબેશ ત્રણ પ્રકારે ચલાવવામાં આવશે. (1) જે લોકોએ 100 સભ્યો બનાવ્યાં છે તેઓને તા.21-22-23-24ઓક્ટો દરમ્યાન મંડલ કક્ષાએ “સક્રિય સદસ્યતા બેઠક” બોલાવીને તમામના ફોર્મ ભરવામાં આવશે. (2) પક્ષના જૂના પ્રદેશ-જિલ્લા-મંડલ કક્ષા તેમજ મોરચાના આગેવાનોને સક્રિય સભ્યો બનાવવા માટે તેઓ દ્વારા જ ઝૂંબેશ કરવામાં આવશે. (3) દરેક બુથમાં 2-3 સક્રિય સભ્યો બનાવવાની ઝૂંબેશ કરવામાં આવશે.
ગુજરાત મુખ્યપ્રધાન ભૂપેન્દ્રભાઈ પટેલને સક્રિય સભ્યનું ફોર્મ ભરાવવાના અવસરે ગુજરાત ભાજપ મહામંત્રી રજનીભાઈ પટેલ, સક્રિય સદસ્યતા ચકાસણી સમિતિ ભરત પંડયા, લોકસભાના સંસદ સભ્ય દિનેશભાઈ મકવાણા, અમદાવાદના પૂર્વ મેયર બિજલબેન પટેલ, પ્રગ્નેશભાઈ બ્રહ્મભટ્ટ વગેરે ઉપસ્થિત રહ્યાં હતાં.