કોરોનાની વૈશ્વિક મહામારી સામે કોરોના વાયરસ વિરોધી વેક્સિન શોધવા માટે દુનિયાના તમામ દેશોની વૈજ્ઞાનિકોની રીસર્ચ ટીમ કામે લાગી ગઈ છે, અનેક સ્થળોએ સારા સમાચાર મળી રહ્યા છે. પરંતુ નક્કર કહી શકાય તે રીતે છાતી ઠોકીને કહી શકાય કે હા આ કોરોનાની રસી છે, તેનાથી કોરોના થશે જ નહી અને થયો હોય તો મટી જશે. આવું પરિણામ હજી બહાર આવ્યું નથી. આ સંજોગો વચ્ચે ગુજરાતમાંથી ગુડ ન્યૂઝ મળ્યા છે. ડીસીજીઆઈએ ગુજરાતની ઝાયડસ કેડિલાને કોરોનાની વેક્સિનનું માનવ પરીક્ષણ કરવાની પરવાનગી આપી છે.
ગુજરાતની પ્રતિષ્ઠિત કંપની ઝાયડસ કેડીલા દ્વારા કોરોના વાયરસ થી બચવાના ઉપાયરુપે વાયરસ વિરોધી રસી બનાવવાના પ્રયાસો હાથ ધર્યો હતો, જેમાં તેઓએ કોરોના વાયરસના સ્પાઇક પ્રોટિનના જીન્સને એંનકોડ કરી રસી તૈયાર કરવામાં સફળતા મેળવીને ગુજરાતને મેડીકલ હબ ક્ષેત્રે નવતર આયામનો પ્રયાસ કરીને ગુજરાતને વેશ્વિક સ્તરે પ્રસ્થાપિત કરી ગુજરાતનું ગૌરવ વધાર્યુ છે એમ ફુડ એન્ડ ડ્રગ કમિશ્નર ડૉ.એચ. જી. કોશિયા દ્વારા જણાવાયુ છે.
ઝાયડસ કેડિલા કંપનીએ નોન રેપ્લીકેટીંગ અને નોન- ઇંટીગ્રેટીંગ પ્લાસ્મીડ ની મદદથી આ r-DNA રસી તૈયાર કરી છે. જે અંગેની ટ્રાયલ બેચ બનાવવા ગુજરાતની ફુડ એન્ડ ડ્રગ્સ કંટ્રોલ એડ્મિનિસ્ટ્રેશન દ્વારા ટેસ્ટ લાયસન્સ આપવામાં આવ્યુ છે. રસીનુ સફળ પરિક્ષણ જુદાજુદા પ્રાણીઓમાં કરી કંપની દ્વારા પ્રી-ક્લિનિકલ તબક્કો સફળતાપુર્વક પૂર્ણ કરેલ છે. ડ્ર્ગ કંન્ટ્રોલર જનરલ ઓફ ઇન્ડીયા, દીલ્હી દ્વારા કંપની દ્વારા રજૂ કરેલ સેફ્ટી તથા પરિક્ષણ અંગેના ડેટા સંતોષકારક જણાતા આ રસીને માનવ પરિક્ષણ અર્થે ફેઝ-૧ અને ફેઝ -૨ ક્લિનીકલ ટ્રાયલ માટે તા.૦૨/૦૭/૨૦૨૦ ના રોજ મંજૂરી આપેલ છે. જેના સંદર્ભે કંપની દ્વારા ભારતના જુદા જુદા ભાગમાં અંદાજે ૧૦૦૦ જેટલા વ્યક્તિઓ પર રસીનુ પરીક્ષણ હાથ ધરશે.
રસીનુ પરીક્ષણ ૨૮ પ્રકારના ટોકસી સીટી પ્રાણીઓ પર કરાયા છે, આ પરીક્ષણમાં પણ સફળતા મળી છે અને તે રોગપ્રતિકારક હોવાનુ પુરવાર થયેલ છે. રસીની મદદથી ઉત્પન્ન થતી એન્ટીબોડી દ્વારા સૌથી ઘાતક વાયરસને પણ તે નબળો પાડવામાં સક્ષમ હોવાનુ જણાયેલ છે. જો આ રસી માનવ પરીક્ષણમાં સંતોષકારક પરીણામ આપે તો નજીકના ભવિષ્યમાં ગુજરાતની ફાર્મા કંપની દ્વારા સમગ્ર વિશ્વને કોરોના વિરોધી રસી ઉપલબ્ધ કરવામાં સફળતા મેળવશે જે ગુજરાત માટે ગૌરવની બાબત છે.
આજ કંપની દ્વારા ભુતકાળમાં વર્ષ ૨૦૧૦-Swine Flu Pandemic” સમયે દેશમાં સૌ પ્રથમ Swine Flu વિરુધ્ધ H1N1 રસીનુ સફળતાપુર્વક નિર્માણ કરવાનો શ્રેય પણ ઝાયડસ કેડિલાને જાય છે.